Sá sem lýkur námi á námsbrautinni hlýtur starfsheitið heilsunuddari og hefur, skv. reglum Félags íslenskra heilsunuddara (FÍHN), rétt til að setja á stofn og starfrækja nuddstofu. Þegar nemendur útskrifast af brautinni fá þeir í hendur starfsmenntaskírteini samhliða prófskírteini, sem þeir geta haft uppi á starfsstöð sinni til staðfestingar á því að þeir hafi lokið námi á heilsunuddbraut. Námsskráin er viðurkennd af menntamálaráðuneytinu en starfsheiti og störf heilsunuddara eru enn ekki lögvernduð. FÍHN hefur unnið ötullega að því undanfarin ár að fá þessa formlegu lögverndun á starfsheitinu, enda myndi það tryggja betur öryggi þeirra sem vilja kaupa sér þjónustu fagmenntaðs nuddara og koma í veg fyrir að ómenntaðir aðilar sigli undir fölsku flaggi.